पालघर

सन 2014 मध्ये ठाणे जिल्ह्याचे विभाजन होऊन पालघर हा महाराष्ट्रातील 36 वा जिल्हा म्हणून अस्तित्वात आला. त्यानंतर महाराष्ट्र शासनातर्फे एमआरटीपी अधिनियम, 1966 च्या कलम 113(3अ) अंतर्गत 440.57.90 हे. क्षेत्रावर पालघर जिल्हा मुख्यालय आणि पालघर नवीन शहर विकसित करण्यातकरिता दि. 01.10.2016 च्या अधिसूचने अन्वये सिडकोची विशेष नियोजन प्राधिकरण म्हणून नियुक्ती करण्यात आली. सदर प्रकल्पा अंतर्गत सिडकोतर्फे जिल्हा स्तरावरील विविध कार्यालयांसह रस्ते, पदपथ, पाणी व विद्युत पुरवठा, मलनि:सारण इ. पायाभूत सुविधा 103.57.90 हेक्टरव विकसित करण्यात येणार आहेत. उर्वरित 337.00 हेक्टरवर पालघर नवीन शहर विकसित करण्यात येणार आहे.

सदर प्रकल्पाकरिता आवश्यक जमीन महाराष्ट्र शासनाकडून सिडकोला हस्तांतरित करण्यात आली आहे. या प्रकल्पाकरिता रु. 3579.00 कोटी इतका खर्च (वर्ष 2015-16 नुसार) अंदाजित आहे. सिडकोच्या भूमी विनियोग धोरणानुसार प्रकल्प क्षेत्रातील विकसित करण्यात आलेल्या जमिनींच्या विक्रीद्वारे प्रकल्पाचा खर्च भागविण्यात येणार आहे. पालघर जिल्हा मुख्यालय आणि पालघर नवीन शहर प्रकल्पाचा भूमिपूजन समारंभ दि. 8 नोव्हेंबर, 2017 रोजी मा. मुख्यमंत्री, महाराष्ट्र राज्य यांच्या हस्ते पार पडला.