नवीन औरंगाबाद

नवीन औरंगाबाद प्रकल्पासाठी सिडकोची 30 ऑक्टोबर, 1972 रोजी विशेष नियोजन प्राधिकरण म्हणून नियुक्ती करण्यात आली. या प्रकल्पांतर्गत एकूण 1,012 हेक्टर जमिनीवर सिडकोतर्फे 21,012 घरे बांधण्यात येऊन उद्याने आणि क्रीडांगणे विकसित करण्यावरही भर देण्यात आला व नवीन औरंगाबादचे 1 एप्रिल, 2006 रोजी औरंगाबाद महानगरपालिकेस हस्तांतरण करण्यात आले.

सिडको सभागृह, नवीन औरंगाबाद

सिडकोतर्फे 7,832 चौ.मी. क्षेत्रावर अत्याधुनिक तंत्रज्ञानावार आधारित उभारण्यात आलेल्या या सभागृहाकरिता रु. 4 कोटी इतका खर्च आला. या द्विस्तरीय आसन क्षमता 1100 इतकी असून या सभागृहात भव्य प्रदर्शन केंद्र (530 चौ.मी.) आणि फ्री स्टॅंडिंग ग्रॅन्ड स्टेअरकेस यांचा समावेश आहे. या सभागृहाचे उद्घाटन 21 नोव्हेंबर, 2008 रोजी होऊन 16 एप्रिल 2010 रोजी हे सभागृह औरंगाबाद महानगरपालिकेस सुपूर्द करण्यात आले.

हज हाउस, औरंगाबाद

महाराष्ट्र शासनातर्फे या प्रकल्पाची जबाबदारी ठेव खर्च प्रणालीनुसार सिडकोवर सोपविण्यात येऊन प्रकल्पासाठी रु. 29.88 कोटींच्या खर्चास मंजुरी देण्यात आली. शासनाच्या अल्पसंख्याक विकास विभागाच्या वतीने सिडकोतर्फे हा प्रकल्प विकसित करण्यात येणार आहे. ऐतिहासिक वास्तूंचा वारसा लाभलेल्या या शहराच्या सौंदर्यात भर घालणारे हे संकुल ठरणार आहे. या संकुलामध्ये 24 डॉर्मिटरी, स्वच्छतागृहे, वजूसाठी सुविधा, व्हीआयपी कक्ष, उपहारगृह, भोजन, प्रार्थनागृहे इ. सुविधा प्रस्तावित आहेत. 

वंदे मातरम सभागृह, औरंगाबाद

महाराष्ट्र शासनातर्फे ठेव खर्च प्रणालीनुसार या प्रकल्पाचे काम सिडकोला सोपविण्यात आले असून उच्च आणि तंत्रशिक्षण विभागाच्या वतीने हे सिडको हा प्रकल्प विकसित करणार आहे. महाराष्ट्र शासनातर्फे या प्रकल्पासाठी रु. 23.75 कोटींच्या खर्चास मंजुरी देण्यात आली आहे. देशाचे राष्ट्र गान असलेल्या वंदे मातरम या गीतास मानवंदना म्हणून हा प्रकल्प साकारण्यात येत आहे. या प्रकल्पाद्वारे कलाप्रकारांना व कलाकारांना प्रोत्साहन देण्यासाठी कला दालन, प्रदर्शन केंद्र, 1050 आसन क्षमतेचे सभागृह, कलाकार व व्हीआयपींसाठी कक्ष इ. सुविधा प्रस्तावित आहेत.