नियोजित प्रकल्प

महाराष्ट्र राज्य सरकारने ३० सप्टेंबर २०१० रोजी भारतीय ट्राम वे कायदा, १८८६ च्या अंतर्गत नवी मुंबई सार्वजनिक जलद वाहतूक यंत्रणेच्या अंमलबजावणीसाठी सिडकोची नेमणूक केली. नवी मुंबईचा मुंबईशी संपर्क वाढविण्यासाठी मेट्रो मार्गिकांचा विचार केला आहे. दिल्ली मेट्रो रेल महामंडळाकडे (डी.एम.आर.सी.) सल्लागार म्हणून नवी मुंबईच्या वाहतूक विकासाचा सुसाध्यता अहवाल देण्याची जबाबदारी सोपविण्यात आली.

डी.एम.आर.सी.च्या शिफारशीनुसार नवी मेट्रो प्रकल्पसाठी एकूण सहा मार्गिकांची आखणी केली आहे. आणि त्या ३ टप्प्यात विकसित करण्यात येणार आहेत. त्या अशा: १) बेलापूर ते पेंधर, २) महाराष्ट्र औद्योगिक विकास महामंडळ (म.औ.वि.म.) , तळोजा ते खांदेश्वर, ३) टप्पा पेंधर ते म.औ.वि.म.मधील आंतरजोड. त्यानंतर चौथ्या टप्प्यात ही मार्गिका न.मु.आंतरराष्ट्रीय विमानतळापर्यंत वाढविण्याचा निर्णय घेण्यात आला.

पहिल्या टप्प्यात सिडकोने मार्गिका १ मार्ग १ (बेलापूर ते पेंधर) हा ११.१० कि.मी. चा ११ स्थानके आणि १ डेपो असलेलं मार्ग हाती घेतला आहे. याचा खर्च रु ३०६३.६३ कोटी अंदाजे असेल. सिडकोच्या शिल्लक रकमेतून हा खर्च भागवला जाणारा आहे. केंद्रीय नगर विकास मंत्रालयाने ९ जानेवारी २०१५ रोजी नवी मुंबई मेट्रो रेल प्रकल्प मार्गिका १, मार्ग १ (बेलापूर ते पेंधर) यांस मार्गिकेचा प्रकल्प केंद्रीय मेट्रो रेल्वे (बांधकाम) कायदा १९७८ कलम ३२ अन्वये अधिसूचित केला.

कामाचे भूमिपूजन १ मे २०११ रोजी पार पडले. या मार्गीकेचे काम सध्या प्रगतीपथावर आहे. बेलापूर ते पेंधर मार्गिका खालील प्रमाणे टप्प्या-टप्प्याने विकसित करण्यात येत आहे:

टप्पा	कॉरिडॉर	लांबी	स्थानके	प्रकल्प खर्च
टप्पा-१	बेलापूर ते पेंधर	११.१० किमी	११	रु ३०६३.६३ कोटी
टप्पा-२	खांदेश्वर ते तळोजे एम.आय.डी.सी.	०७.१२ किमी	०६	रु. २८२०.२० कोटी
टप्पा-३	टप्पा १ व २ मधील आंतरजोड	०३.८७ किमी	०३	रु. १७५०.१४ कोटी
टप्पा-४	खांदेश्वर ते न.मु.आ.वि.	०४.१७ किमी	०१	रु. १२७०.१७ कोटी
	एकूण	२६.२६ किमी	२१	रु. ८९०४.१४ कोटी

* तपशीलवार प्रकल्प अहवालात देण्यात आलेली मेट्रो मार्गिका २,३ व ४ चा अंदाजे खर्च