मुंबई ट्रान्स हार्बर लिंक

मुंबई शहरातील वाहतूक कोंडी कमी करण्याबरोबरच नवी मुंबई शहराचा विकास करण्याच्या उद्देशाने मुंबई पारबंदर प्रकल्पाचा प्रस्ताव सुमारे ३० वर्षांपासून विचाराधीन होता. राज्य शासनाने ४ फेब्रुवारी २००९ रोजी हा प्रकल्प मुंबई महानगर प्रदेश विकास प्राधिकरणाकडे सोपवला. रस्ते वाहतूक प्रकल्प म्हणून नियोजित असलेल्या या प्रकल्पाला शासनाने ८ जून २०११ रोजी प्रादेशिक विकास प्रकल्पाचा दर्जा दिला.     

मुंबई व नवी मुंबई मधील वाहतूक वेगाने व्हावी यासाठी न्हावा-शेवा (नवी मुंबई) आणि शिवडी (मुंबई) दरम्यान २२ कि. मि लांबीच्या सहा पदरी दुहेरी (३+३ मार्गिका) पुलाचा अंतर्भाव यात आहे. या पुलाची समुद्रावरील लांबी १६.५ कि. मि., जमिनीवरील पोहोचमार्ग (अप्रोच रोड) पुलाची लांबी ५.५. कि.मि. असेल. तसेच शिवडी, नवी मुंबईतील शिवाजी आणि चिर्लेनजिक महामार्ग ४ ब वर मार्ग बदलण्यासाठी फाटे देण्यात येणार आहेत.

या पारबंदर प्रकल्पाला जायका अर्थात जपान इंटरनॅशनॅल कोऑपरेशन (जेआयसीए) यांनी अर्थसहाय्य देण्यास मंजुरी दिली आहे. त्यांनी प्रकल्पाची अंदाजे किमत रु. १७, ८४३ एवढी मुक्रर केली आहे. या प्रकल्पाच्या विकासासाठी एमएमआरडीएची नोडल एजन्सी म्हणून नेमणूक झाली आहे. सदर प्रस्तावित प्रकल्पामुळे नवी मुंबई सुकर रहदारीने नवी मुंबईशी जोडली जाईल व व्यापार-उदिमास चालना मिळेल.

पारबंदर प्रकल्पामुळे न. मु. आं. विमानतळाकडे त्वरित पोहचवणारा मार्ग मिळणार आहे. नवी मुंबई आणि कोंकण यातील अंतर कमी होऊन वेळ व इंधन बचतही होईल. परिणामी नवी मुंबई व रायगडमधील विकासास चालना मिळेल. सिडको, एनएमएमसी आणि जेएनपीटी हे लाभार्थी या प्रकल्पाच्या विकासासाठी आपापला सहभाग देतील.केंद्रीय पर्यावरण, वणे व हवामान बदल मंत्रालयाने सागरी नियमन क्षेत्र तसेच पहिल्या टप्प्यासाठी वन क्षेत्राची जमीनीतून मार्ग काढण्यास परवानगी दिली आहे. टप्पा १, २ व ३ साठी निविदा प्राप्त झाल्या असून स्वीकार पत्र प्रदान करण्यात आले आहे.