इंटरनॅशनल टेक्नॉलॉजी सेंटर

इंटरनॅशनल टेक्नॉलॉजी सेंटर

महाराष्ट्रासाठी हा परिसर अभिमानास्पद बाब ठरेल याची काळजी घेत सिडकोने येथे आणखी एका इन्फोटेक केंद्रांचे कार्यान्वयन सुरू केले. बेलापूर क्षेत्र जो मध्यवर्ती व्यापार जिल्हा (सीबीडी) म्हणून ओळखला जात होता, तेथे इंटरनॅशनल टेक्नॉलॉजी सेंटर सुरू झाले. देशभरातील कोणत्याही ठिकाणाशी द्रुतगती महामार्गाद्वारे जोडला गेलेला, तसेच रस्ते, रेल्वे त्याचप्रमाणे जलमार्ग अशा प्रभावी परिवहन सुविधेने समृद्ध असे हे ठिकाण आहे. हे केंद्र रेल्वे स्थानक संकुलातच उभे राहिले. सुंदररीत्या रचना केलेल्या इमारतीत अत्याधुनिक तंत्रज्ञानात्मक पायाभूत सोयीसुविधांनी संपन्न १०,००,००० चौरस फूटांचे बांधकाम क्षेत्र यातून उपलब्ध झाले. पुरेसा, विनाखंड व स्थिर वीज पुरवठा, नजीकच्या परिसरात निवासाच्या सुविधा, हेल्थ क्लब्स, सुरचित परिषद सभागृह सुविधा, मुबलक वाहन तळ सुविधांसह उद्यान व बगीचे अशी वैशिष्ट्य असलेले हे केंद्र आयटीसमर्थ सेवा पुरविणाऱ्या कंपन्यांसाठी एक आदर्श ठिकाण बनले. साहजिकच आयटी क्षेत्रातील विप्रोसारख्या बड्या कंपनीची येथे लगोलग पदचिन्हे उमटली आणि उपलब्ध विक्रीयोग्य क्षेत्रापैकी १६ टक्के क्षेत्र (१,५६,००० चौरस फूट) एकट्या या कंपनीने घेतले.